Subah balcony mein se bahar jhaanko, to hawaa mein ek alag si thandak hoti hai... Dhoop suhani lagne lagti hai... Bacche 'Bapu' bane - hath mein chadi liye school jaate dikhte hain...
Maa kaan aithne shuru kar deti hai - diwali aane wali hai, ghar ki safai mein hath bantaao. Par uska bhi alag mazaa hota hai...Kitna sakoun milta hai, jab poore ghar mein ek fresh si smell aati hai :)
Fir aate hain navraatre. Ghar mein kandi ke dhooyein ke sath failti khusboo, aur mata ki arti ke sath, jau boye jate hain. Poore din ke vrat ke baad khane ka swaad bhi alag hota hai, kuttu ki poori - sabut dane ki khichdi aur aloo ka haluwa... yummy :P
Dusshera ke din jaise jaise kareeb aate jaate hain, waise waise bachon ka utsaah badhta jata hai... Hamara raavan sabse bada banega... Hum mele mein ye stall lagayenge...
Are, maine aapko abhi tak bataya kya, I belong to Jaipur. Wahan har colony mein log milke mele lagate hain, jahan sab gharon se kuch na kuch khane peene, games ki stalls hoti hain. Choti Choti khusiyaan baant ke ek pariwaar ban jata hai...
Ram ji ke dhanush se teer nikalte hi shuru ho jata hai Diwali ka jashn... Mere ghar mein, ghar sajane ki duty hamesha se mere hi rahi. Pa ke sath market jana aur le aana dheron cheezein...
Mitti ke diye
Rang birangi Kandeelein
Rangoli ke liye rang
Pooja ka samaan - Laxmi Ganesh ji ki mitti ki moorti, gende ke phoolon ki malayein, diye ki battiyaan, mithai...
Aur, pataakhe :) Dher Saare...
Diwali se ek din pahle aati hai 'Dhanteras', jab maa koi bartan ya chandi ka sikka leke aati hai...
Diwali wale din subah se hi ghar preparations shuru ho jati hai...Diyon ko dho ke sukhane rakhna, ghar mein har dwaar pe 'Shubh-Laabh' likhna, aam k patton ki bandan-waar lagana, rangoli sajana...
Shaam hote hote Maa mahurat ki yaad dilaane lagti hai. Hum naye kapde pahan ne ko utaawle ho sajne sanwarne mein lag jaate hain... Aur fir, Pa k sath Laxmi poojan hota hai...
Ghar roshni se jagmaga uthta hai. Bahar nikal ke aayein to har koi diye laga raha hota hai, har taraf khushiyan. Silsla shuru hota hai mehmaano ke aane jaane ka. Khoob mithai khayi-khilayi jaatin hai...
Hum intezaar kar rahe hote hain, kab maa poori chole khane ko de, aur kab hum jaldi se kha ke, bahar pataakhe phodne jaayein...
Jaise jaise raat hone lagti hai, waise waise bacche plan karte hain kiski neend udaayi jaye :)
Diwali ke baad aata hai 'Govardhan'. Maa subah gobar se devta banati hai, aur pooja karti hai. Khane me 'satsaga' milta hai kadhi ke sath. (Aisa hi hai, har tyohar ke sath ek khana judaa hota hai... hehe).
Next day hota hai, bhaii dooj. Hum bhai ko kalawa baandhte hain, aur wo humein paise deta hai. ye baat alag hai ki usse double khud k liye leta hai maa se...
Aur is tarah khatam hota hai tyohaaron ka silsila...
Mujhe vishwaas nahin ho raha main itna kuch likh gayi, ye shayad us subah ki hawaa ka hi asar hai, ki jaane kitni yaadein samet le aayi...
Yaadein hi to hain jo de jati hain ek ehsaas... Pyaar ka... Pyaar karne ka... Pyaar paane ka...
BeingLoved...
